उरण नवी मुंबई-
आज शुक्रवारपासून उरणला जोडणाऱ्या नवी मुंबई महानगरपालिकेची ३१ व ३० क्रमांकाच्या एनएमएमटीची बससेवा पूर्ण बंद करण्याचा निर्णय व्यवस्थापनाने घेतला आहे. त्यामुळे या बसने प्रवास करणाऱ्या हजारो प्रवाशांना याचा फटका बसणार आहे. उरणमध्ये कोपरखैरणे ते उरण ही ३१ तर कलंबोली ते उरण या मार्गावरील ३० या दोन क्रमांकाच्या बस सुरू आहेत. या बस मधून दिवसाला ७ हजारांपेक्षा अधिक प्रवासी प्रवास करीत होते. ४२ बसच्या एकूण १२० फेऱ्या या मार्गावर चालविण्यात येत होत्या या बसमुळे उरणच्या नागरिक,विद्यार्थी आणि चाकरमानी यांच्या प्रवासासाठी महत्त्वाची सेवा बनली आहे. मात्र ही सेवाच आता बंद करण्याचा निर्णय एनएनएमटी व्यवस्थापनाने घेतला आहे.खोपटे येथे झालेल्या भीषण अपघातानंतर नवी मुंबईतील जुईनगर रेल्वे स्थानक ते उरणच्या कोप्रोली गाव दरम्यानची या मार्गावरील एन एम एम टी ची ३४ क्रमांकाची बस सेवा अनिश्चित काळासाठी बंद करण्यात आली होती. अपघाताच्या घटनेनंतर एन एम एम टी च्या कामगारांनी या मार्गावर काम करण्यास नकार दिला त्यामुळे या मार्गावर दिवसभर ५२ फेऱ्या आणि ५ हजारांपेक्षा अधिक प्रवासी प्रवास करीत होते. त्याचवेळी उरणच्या उर्वरित मार्गावरील वाहतूक ही बंद करण्याची मागणी कामगारांनी केली होती.
उरणच्या मार्गावरील एन एम एम टी ची सेवा पूर्ण बंद करण्याचा निर्णय व्यवस्थापनाने घेतला असून कामगार कर्मचारी यांची सुरक्षा महत्वाची असल्याचे मत एन एम एम टी सेवेचे व्यवस्थापक योगेश कडूस्कर यांनी दिली आहे.
