पाचोरा-
पाचोरा तालुक्यातील पिंपळगाव हरेश्वर पोलिस स्टेशनच्या हद्दीतील वरखेडी येथे एका इसमाने स्वतःच्या राहत्या घरात आर्थिक फायद्यासाठी अनैतिक देहव्यापार चालवून परिसरात कायदा, सुव्यवस्थेचा गंभीर प्रश्न निर्माण केला होता ही गुप्त माहिती मिळताच सहाय्यक पोलिस निरीक्षक कल्याणी वर्मा यांनी ही बाब उपविभागीय पोलिस अधिकारी, पाचोरा विभाग यांच्या निदर्शनास आणून दिली. माहिती मिळताच त्यांनी पाचोरा पोलिस स्टेशनचे पोलीस निरीक्षक राहुलकुमार पवार यांच्या नेतृत्वाखाली स्वतंत्र पथक गठीत करून कारवाईचे आदेश दिले होते.
या आदेशानुसार पिंपळगाव हरेश्वर पोलिस स्टेशनच्या सहाय्यक पोलिस निरीक्षक कल्याणी वर्मा, पोलिस हेडकॉन्स्टेबल अतुल पवार, अभिजित निकम, पोलिस नाईक राहुल बेहरे, पोलिस कॉन्स्टेबल नामदेव इंगळे, अमोल पाटील, दिपक सोनवणे, महिला पोलीस कॉन्स्टेबल योगिता चौधरी, वाहन चालक पोलिस कॉन्स्टेबल सागर पाटील तसेच दोन पंच व पंटर यांच्या पथकाने वरखेडी येवून दोन पंच व पंटरच्या माध्यमातून वरखेडी येथील संबंधित घरात छापा टाकला. पंटरच्या माध्यमातून टाकण्यात आलेल्या या छाप्यात वरखेडी येथील हैदर शहा रशिद शहा (वय वर्षे ४५) हा स्वताच्या फायद्यासाठी आपल्या राहत्या घरात महिलांना बोलावून त्यांना अल्प मोबदला देऊन त्यांच्यामार्फत देहव्यापार करुन घेत कुंटणखाना चालवत असल्याचे रंगेहाथ आढळून आल्याने या प्रकरणी हैदर शहा याचा विरोधात पोलिस हेडकॉन्स्टेबल अतुल पवार यांच्या फिर्यादीवरुन पिंपळगाव हरेश्वर पोलिस स्टेशनला गुन्हा रजिस्टर नंबर ३५२/२०२५ अन्वये स्त्रिया व मुलींचा अनैतिक व्यापार (प्रतिबंध) अधिनियम १९५६ चे कलम ३, ४ व ५ अंतर्गत गुन्हा नोंदविण्यात आला आहे.या गुन्ह्याचा पुढील तपास सहाय्यक पोलिस निरीक्षक कल्याणी वर्मा करीत आहेत. पोलिसांच्या या कारवाईमुळे परिसरात सुरू असलेल्या अवैध धंद्यांना चाप बसला असून नागरिकांनी समाधान व्यक्त केले आहे.
