पाचोरा-
पाचोरा येथील न्यायालयाच्या प्रांगणात तालुका विधी सेवा समिती, पाचोरा व पाचोरा तालुका विधिज्ञ बंधू भगिनी यांच्यातर्फे १३ सप्टेंबर रोजी विधी सेवा समितीचे अध्यक्ष तथा दिवाणी न्यायाधीश क स्तर एस. व्ही निमसे यांच्या अध्यक्षतेखाली राष्ट्रीय लोक न्यायालयाचे आयोजन करण्यात आले. यात दिवाणी न्यायाधीश एस.व्ही. निमसे, सहदिवाणी न्यायाधीश जी. एस. बोरा यांच्या न्यायालयातील एकूण १५४ इतकी प्रकरणे निकाली निघाली. त्यात १ कोटी ७ लाख ५० हजार ९४१ रुपये इतकी वसुली झाली. तसेच वादपूर्व ३०६ प्रकरणांचा निपटारा होवून यात ५२ लाख १८ हजार १७४ रुपये इतकी रक्कम वसुल झाली आहे. एकूण १ कोटी ५९ लाख ६९ हजार ११५ रुपये इतकी रक्कम वसूल झाली आहे. यावेळी कौंटुंबिक वादामधील १२ प्रकरणे निकाली निघाले. त्यापैक एक कुटुंबामध्ये तडजोड होऊन आनंदाने नांदावयास गेले.
यावेळी पॅनल प्रमुख म्हणून न्यायाधीश एस.व्ही. निमसे तसेच पंच सदस्य म्हणून अॅड. भाग्यश्री महाजन यांनी कामकाज पाहिले. याप्रसंगी प्रांताधिकारी भूषण अहिरे यांचीही प्रमुख उपस्थिती होती.
लोकन्यायालय यशस्वीतेसाठी पाचोरा न्यायालयातील सर्व वरिष्ठ, कनिष्ठ विधिज्ञ, उपविभागीय अधिकारी कार्यालय कर्मचारी, तहसील कार्यालय कर्मचारी, पंचायत समितीचे विस्तार अधिकारी, बँक अधिकारी, कर्मचारी, बी. एस. एन. एल. अधिकारी, वीज महावितरण अधिकारी,कर्मचारी, पाचोरा व पिंपळगाव (हरेश्वर) पोलीस स्टेशन अधिकारी, कर्मचारी तथा न्यायालयातील सहाय्यक अधीक्षक, वरिष्ठ लिपिक, कर्मचारी यांनी सहकार्य केले. यावेळी पक्षकार आपल्या प्रकरणांमध्ये तडजोड करून घेण्यास मोठ्या संख्येने उपस्थित होते.
