पाचोरा-
पाचोरा येथील तहसील मधील सव्वा कोटीच्या अनुदान घोटाळा प्रकरणी दाखल गुन्ह्यातील आरोपितांनी परीक्षेची तयारी करणाऱ्या विद्यार्थ्यांचे आधार,बँक पासबुक,पॅनकार्डचा वापर करण्यात आल्याची माहिती समोर आली असून दोघे आरोपितांची बँक खाते फ्रीज करण्यात आले असून प्रॉपर्टी वर बोझा बसविण्यात आला आहे.याबाबत सविस्तर वृत्त असे की,पाचोरा तहसिल मध्ये सन 2022 ते सन 2024 पावेतो अमोल सुरेश भोई यांनी स्वतःचा आर्थिक लाभ होण्याचे दृष्टीकोणातुन गणेश हेमंत चव्हाण याचे संगनमताने 2022-2023 आर्थिक वर्षामध्ये 122 व सन 2024-2025 आर्थिक वर्षामध्ये 225 असे एकूण 347 व्यक्तींच्या खात्यावर नैसर्गीक आपत्तीमधिल बाधीत शेती पिकांचे अनुदान देणे पात्र नसतांना, त्यांच्या नावावर शेती नसतांना, आवश्यक कागदपत्रे न घेता बनावट यादया तयार करुन राज्य शासनाची, शेतक-यांची, सामान्य जनतेची, प्रशासनाची, अधिकारी व कर्मचा-यांची फसवणुक करुन अशा व्यक्तींना लाभ दिलेला आहे. तसेच जुन ते ऑक्टोंबर 2022 मधिल पंचनाम्यांच्या अभिलेखात खोटे, बनावट शासकिय दस्तऐवज तयार करुन शासकिय कर्मचा-यांच्या बनावट सह्या करुन लोकप्रतिनीधींच्या बनावट सहया करुन खोटे दस्तऐवज तयार केले आहे. तसेच तहसिलदार पाचोरा यांचे लॉगीन आय.डी. व पासवर्डचा दुरुपयोग स्वतःच्या आर्थिक फायदयासाठी करुन शासकिय संगनकाचा गैरवापर केला आहे. तसेच लाभार्थी यांचेशी संपर्क साधुन त्यांचेकडुन त्यांचे खात्यावर जमा झालेली रक्कम स्वतः करीता काढुण घेतलेली आहे. अमोल सुरेश भोई, तत्कालीन महसुल सहायक यांनी बनावट दस्ताचा वापर करुन एकुण 1,20,13,517/-मात्र (अक्षरी एक कोटी वीस लक्ष तेरा हजार पाचशे सतरा मात्र) इतक्या शासकीय रकमेचा अपहार केल्याचे निदर्शनास आले आहे. त्याअनुषंगाने अमोल सुरेश भोई, तत्कालीन महसुल सहायक, पाचोरा व गणेश हेमंत चव्हाण, मुख्यमंत्री युवा प्रशिक्षणार्थी व ज्यांनी ज्यांनी अमोल भोईला आर्थिक अफरातफर करण्यास अनुदानाची शासकिय रक्कम हडप करण्यास मदत केली अशी फिर्याद पाचोरा तहसीलदार विजय बनसोडे यांनी पाचोरा पोलिसात दाखल केल्याने तत्कालीन महसूल सहायक अमोल सुरेश भोई व मुख्यमंत्री युवा प्रशिक्षणार्थी गणेश हेमंत चव्हाण, पाचोरा या दोघांविरोधात पाचोरा पोलिसात गुरुन428 /2025,भारतीय न्याय संहिता सन 2023 चे कलम 316 (4),316(5),318 (4),335,336,(2) (3),340 (2), 3 (5)नुसार गुन्हा दाखल करण्यात आला असून सदर गुन्हा आर्थिक गुन्हे शाखेकडे वर्ग झाल्याने पुढील तपास आर्थिक गुन्हे शाखा करीत आहे.दरम्यान फसवणूक प्रकरणी दाखल गुन्ह्यातील आरोपी अमोल भोई व गणेश चव्हाण यांनी अनुदान घोटाळ्यासाठी एमपीएससी, यूपीएससी, पोलीस भरती परीक्षेची तयारी करत असलेल्या विद्यार्थ्यांचे आधार,बँक पासबुक,पॅनकार्ड चा वापर केला असल्याची माहिती समोर आली असून या विद्यार्थ्यांचा आरोपितांशी संपर्क आला कसा?विद्यार्थ्यांच्या खात्यावर रक्कम कशी जमा झाली? ही रक्कम खात्यात पडून आहे की कुठं वर्ग झाली? नेमकं या विद्यार्थ्यांना काय सांगण्यात आले?या विद्यार्थ्यांचे कागदपत्रे जमा कुणी केले?या विद्यार्थ्यांना काही आमिष देण्यात आले का?असे अनेक प्रश्न उपस्थित होत आहेत. गुन्ह्यातील आरोपींची बँक खाते फ्रीज करण्यात आले असून प्रॉपर्टी वर बोझा बसविण्यात आला असल्याची माहिती पाचोरा तहसीलदार विजय बनसोडे यांनी दिली आहे.तसेच अमोल भोई याचा पुणे येथे फ्लॅट असल्याची माहिती समोर येत असून पाचोरा तहसीलदार विजय बनसोडे हे त्या दिशेने पुढील तपास सुरू आहे.अनुदान घोटाळ्यातील रक्कम ही 34 जणांनी शासनाच्या खात्यात जमा केली असल्याचे पाचोरा तहसीलदार विजय बनसोडे यांनी सांगितले. आता उर्वरित रकमेच्या वसुलसाठी पाचोरा तहसीलदार विजय बनसोडे काय कारवाई याकडे सर्वांचे लक्ष लागून आहे.
